Benedikt Grímsson og Ragnheiður Lýðsdóttir á Kirkjubóli

Benedikt Guðmundur Grímsson og Ragnheiður Lýðsdóttir og annað heimilisfólk á Kirkjubóli, sennilega árið 1925, þegar þau giftu sig og hófu búskap. Lengst til vinstri er Guðjón Grímsson, bróðir Benedikts, síðar bóndi í Miðdalsgröf, Magnús Helgason 12 ára, þá Benedikt og Ragnheiður, síðan Ragnheiður Grímsdóttir systir Benedikts sem var vinnukona á Kirkjubóli alla ævi. Á endanum eru Sigríður Guðmundsdóttir og Grímur Benediktsson foreldrar þeirra systkina. Allt fólkið er á sauðskinnskóm (mynd úr safni Elínar Skeggjadóttur).

Hjónin Benedikt og Ragnheiður

Benedikt var sonur hjónanna á Kirkjubóli, Gríms Bendiktssonar og Sigríðar Guðmundsdóttur sem var frá Víghólsstöðum á Fellsströnd í Dalasýslu. Ragnheiður var dóttir Lýðs Jónssonar og Önnu Magnúsdóttur á Skriðnesenni í Bitrufirði. Benedikt hét eftir tveimur eldri bræðrum sínum sem drukknuðu ungir í Kirkjubólsgilinu.

Börnin: Immi, Diddi, Lilli og Rósa
(Grímur, Sigurður, Lýður og Rósa Jónída)

Búskaparbaslið

HJónin voru ótrúlega dugleg við framkvæmdir á jörðinni og jarðræktina þessa hálfu öld sem þau voru bændur á Kirkjubóli. Ragnheiður tók þá virkan þátt í útiverkum og hrærði steypu með manni sínum þegar byggingarframkvæmdir stóðu yfir. Allur húsakostur var endurnýjaður með steinsteyptum byggingum, tún voru stækkuð mjög og jarðræktarstarf var umfangsmikið.

Félagslíf og fjör

Benedikt og Ragnheiður sátu svo sannarlega ekki auðum höndum og það var líf og fjör á Kirkjubóli. Áður en Sævangur kom til voru stundum haldin námskeið þar heima og gríðarlega gestkvæmt út af öllum þeim félagsmálum og verkefnum sem þau hjónin tóku þátt í. Þátttaka Benedikts í margvíslegu félagsstarfi er alveg með ólíkindum og Ragnheiður stofnaði og stýrði kvenfélagi sveitarinnar og kvenfélagasambandi sýslunnar.