Sögurölt á Bjarnastöðum í Saurbæ (2019)

Sögurölt Sauðfjárseturs á Ströndum og Byggðasafns Dalamanna var í dag í samvinnu við Hugrúnu og Guðmund bændur á Kjarlaksvöllum og var á Bjarnastöðum í Saurbæ.

Röltið var miðvikudaginn 26. júní kl. 19:30 frá hliðinu að Bjarnastöðum. Rölt var um landnámsjörð Sléttu-Bjarna, skoðaðar friðlýstar hofrústir, dys Bjarna og annað sem á veginum varð og gaf tilefni til að stoppa við og segja sögur. Þetta er stutt og þægilegt rölt og fótafúnir geta auðveldlega sleppt þeim stutta hluta sem er á fótinn. Dalamenn, Strandamenn, íbúar Reykhólahrepps og aðrir góðir gestir eru velkomnir í söguröltin sem eru í boði safnanna og engin fjárútlát fylgja því að taka þátt.