Hrútaþuklið (2010) – Elvar Stefánsson Íslandsmeistari
Þá er Íslandsmeistaramótinu í hrútadómum 2010 lokið. Það er skemmst frá því að segja að mótið í ár var best sótti viðburðurinn í sögu Sauðfjárseturs á Ströndum. Yfir 400 manns mættu í Sævang og hvorki fleiri né færri en 71 tóku þátt í hrútadómunum – 43 í flokki óvanra og 28 í flokki vanra dómara. Aldrei hafa fleiri tekið þátt og óhætt er að fullyrða að mótið sé mjög að eflast, vaxa og dafna.
Sigurvegari Íslandsmeistaramóts í hrútadómum árið 2010 var Elvar Stefánsson frá Bolungarvík, en hann hefur keppt í þuklinu svo til frá upphafi og náði meðal annars öðru sæti árið 2005. Í óvana flokknum sigraði Brynja Bjarnfjörð Magnúsdóttir ásamt Emmu Ýr Kristjönudóttur (3ja ára). Mótið var best sótti atburður Sauðfjársetursins í átta ára atburðasögu þess, en yfir 400 manns mættu í Sævang yfir daginn og yfir 2ö0 manns mættu síðan á ball með Geirmundi Valtýssyni um kvöldið.
![](https://saudfjarsetur.is/wp-content/uploads/2021/08/hrutadomar2010a.jpg)
Keppt var sirkustjaldi Strandakúnstar að þessu sinni, en rigning var og fremur kalt framan af þennan ágæta hrútadag. Hrútarnir Spaði, Grafar, Hvellur og Fleygur voru mættir á svæðið og skoðaðir í bak og fyrir. Allir hrútarnir voru í eigu Jóns Stefánssonar á Broddanesi utan þess síðastnefnda sem er í eigu Matthíasar Lýðssonar í Húsavík. Verðlaun voru afar vegleg, meðal annars fengu sigurvegararnir í vana flokknum 5, 10 og 15 skammta af hrútasæði frá Sauðfjársæðingarstöð Vesturlands. Margir aðrir vinningar voru einnig veittir keppendum í þremur efstu sætum í hvorum flokki frá Bændasamtökum Íslands, Sauðfjársetrinu, Strandagaldri, Malarhorni á Drangsnesi, Hólmadrangi, Strandalambi í Húsavík og Strandakúnst á Hólmavík.
Úrslitin urðu þau að Elvar Stefánsson í Bolungarvík stóð uppi sem sigurvegari og Íslandsmeistari í hrútaþukli að þessu sinni.
- Elvar Stefánsson í Bolungarvík
- Björn Torfason á Melum í Árnshreppi
- Eiríkur Helgason í Stykkishólmi
Í flokki óvanra hrútaþuklara:
- Brynja Bjarnfjörð Magnúsdóttir ásamt Emmu Ýr Kristjönudóttur
- ) Guðný Hrönn Þorsteinsdóttir, Reykjavík (11 ára)
- Birna Ingimarsdóttir á Kaldrananesi
Um kvöldið var svo þuklaraball á Hólmavík, stórdansleikur með Geirmundi Valtýssyni. Hann hélt uppi stuðinu fram á rauða ágústnóttina á vel sóttum dansleik í félagsheimilinu á Hólmavík. Ballið hófst k. 23:00 og stendur yfir til 03:00.